RRETH NESH

Botimet Jozef është një shtëpi botuese e krijuar në Durrës në vitin 2012. Nga ky vit e deri më sot ka sjellë për lexuesit shqiptarë një numër të madh botimesh, që nga autorët klasikë francezë si Molière, Voltaire, Victor Hugo, Racine, Corneille, Rostand e të tjerë, (të përkthyera me mjeshtëri nga njohësi i mrekullueshëm i gjuhës franceze, Prokop Gjergo) e deri te ata më të vonë, vendas e të huaj. Një vend të rëndësishëm zënë në fondin e botimeve tona gjithashtu edhe monografitë historike dhe shkencore. Ndër autorët që bashkëpunojnë rregullisht me Botimet Jozef, janë edhe studiuesi i njohur Paolo Muner, poeti Jozef Radi (nën kujdesin e të cilit është botuar edhe vepra e plotë e Lazër Radit), historianët dhe arkeologët Hava dhe Sali Hidri, historiani Romeo Gurakuqi, profesorët Angjelin Shtjefni, Valentina Shehu, Agim Shehu, Pirro Prifti, Gjergji Shqau, Robert Kosova, Indrit Bimi, e mjaft të tjerë, shkrimtarët Nikolla Spathari, Rifat Hoxha, Enton Bido, Engjëllushe Sanxhaku, poeti Edmond Agolli, poetja Etleva Kupsi (nën kujdesin e së cilës kemi promuovuar mjaft autorë të rinj), si dhe mjaft shkrimtarë e studjues të tjerë nga Durrësi, Tirana, Shkodra, Elbasani, Kavaja etj.

Botimet Jozef është pjesëmarrëse e rregullt e panaireve të librit të organizuara në trevat shqiptare, ku mund të përmendim Panairin e Librit të Tiranës, Prishtinës etj. Një nga avantazhet e shtëpisë botuese Jozef, është mundësia për të plotësuar të gjitha kërkesat e autorëve, duke filluar nga cilësia e botimit e duke përfunduar në një kërkesë mjaft të rëndësishme të tyre, atë të numrit të kopjeve të botuara. Falë makinerive që zotëron (pasi Botimet Jozef kanë edhe shtypshkronjën e vet), bën të mundur një cilësi maksimale të botimeve, si nëpërmjet printerave dixhitalë ashtu edhe nëpërmjet makinerive offset. Të dyja këto teknologji i krijojnë mundësi botuesve të zgjedhin më të përshtatshmen, duke variuar nga një numër i kufizuar kopjesh (nëpërmjet stampimit me printera dixhitalë) e deri në sasi të mëdha (me makineritë offset). Proçesi i botimit ndiqet në çdo fazë që nga përpunimi i materialit të sjellë, redaktimi, faqosja dhe dizaini i kopertinës e deri te shtypja përfundimtare e librit.

Ne i kushtojmë kujdes edhe shpërndarjes së librit, nëpërmjet bashkëpunimit me kompani shpërndarjeje dhe librari nga më prestigjozet në vëndin tone, si: Adrion, Albania, ASHTL Dita, Nettrade Albania, etj.

Ndër titujt më të kërkuar, botuar nga Botimet Jozef, mund të përmendim:

– Gjerdani i përkthimeve të Prokop Gjergos (ku përfshihen vepra të klasikëve francezë Molier, Racine, Corneille, Boileau, Hugo, Voltaire, Rostand).

– Titujt: “Pirro”, “Aleksandri i Madh” dhe “Kleoptara”, nga cikli “Njerëz që bënë historinë” të autorit amerikan Jacob Abbot.

-Vepra e plotë e studiuesit triestin Paolo Muner, edhe në version dy gjuhësh (shqip-italisht): “Shpnesa e Shqypniisë – Shqiptarët e Trieshtit”, “Jo vetëm hymni i flamurit”, “Një histori shkodrane”, “Kapiteni i portit të Tivarit”.

– “Fjalori etimologjik i gjuhës shqipe” – nga Kolec Topalli.

– “Shqipëria dhe tokat e lirueme” – nga Romeo Gurakuqi.

– “Historia e Durrësit” – nga Hava dhe Sali Hidri.

– “Sëmundjet, simptomat dhe mjekimi i tyre” – në tre volume – nga Agim Shehu.

– “Dy bredharakë në Shqipëri” – nga Jan & Cora Gordon.

– “Ministri i hekurt – Mirash Ivanaj” nga Lazër Radi.

– “Jeta dhe zakonet e shqiptarëve” – nga Mark Milan (përkthyer nga Lazër Radi).

– “Leksione ëndrrash dhe shpirtrash” – nga Froid & Jung – (përkthyer nga Lazër Radi),

– Vepra e plotë e Platonit – (përkthyer nga Lazër Radi).

– “Jeta e nji njeriu” – vepra e plotë e Giuseppe Ungaretti-t (përkthyer nga Jozef Radi).

– “E bukur është rinia” – nga Herman Hesse – (përkthyer nga Enton Bido).

– Poezi nga Maram Al Masri.- “Poetë disidentë” – mbledhur dhe përkthyer nga Maksim Rakipaj.

– “Kismeti – fati përrallor i Muhamed Aliut, shqiptarit që themeloi Egjiptin modern” – nga N.Yousry.

– Librat për fëmijë: “Fryrësi i ëndrrave” (B.Villiot), “Libri i Xhunglës” (V.Ovaldè), “Katerinë Sertitydë” (P.Modiano).

– “Libri i Olimpiadave Junior 1” – nga Robert Kosova.

Në këtë faqe paraqiten botimet tona, ku mund të informoheni më në detaje.